إجمالي مرات مشاهدة الصفحة

الأربعاء، 20 أكتوبر، 2010

فزعتكم يا النشامى..انا منكم واليكم

فزعتكم يا النشامى..انا منكم واليكم






 الاهل..الاحبة..ادعوكم لحضور حفل افتتاح مقري الانتخابي في الساعة اللي بدكم اياها..مو مشكلة مو انتوا  رح تنتخبوني؟؟..كرمال خاطركم  رح افتح مقر كل دقيقة..والكنافة السخنة ..ناعمة وخشنة على مدار الساعة. والمناسف كمان .أبشروا..ليش هو كل يوم في انتخابات..ما عليكم بس تعالوا وشوفوا( بعدين ما رح تشوفوني)..
ولاد عمي قرايبي..النشامى.. رح اكون مثل ما بدكم..ما رح اخلي شيء بنفسكم وما اعمللكم اياه.. انتوا شايفين الفقر ضارب اطنابه والبطالة مو مخلية حد من شرها وعشانكم انا رح احاربهم الاثنين حتى لو بسيف دونكيشوت ..ابشروا بالوظائف حتى لو عالفئة الرابعة..حتى لو مراسلين بدائرة حكومية( مالهم المراسلين)..انتوا ما عليكم بس قدموا لي كشف باسماء العاطلين عن العمل والمتقاعدين والموظفين كمان كلكم رح تشتغلوا ..صدقوني انا كروتي جاهزة( محروقة) لما ببعثكم لفلان وعلان يدير بالهم عليكم ( اذا بيعرفوني)..رح احكي تلفونات حتى مع رئيس الحكومة ولو كان الخط مفصول بحكي منه وتسمعوا صوتي ما بردكم خائبين..ما رح اخلي من جهدي جهد بس انتخبوني..
اسمعوني..ما رح اخلي شيء بنفسكم وما اعمللكم اياه..انا بعرف بنفسكم قلاية بندورة..وبتموتوا عليها والحكومة نازلة بتصدر فيها..علشان خاطركم رح اغرقكم بالبندورة لحتى تسبحوا فيها وتزهقوا منها..من كثر ما توكلوا قلايات بندورة اللي هلأ مش طايلينها..
انا بدي فزعتكم يا نشامى  ما بدي تخلوا شجرة ولا عمود ضغط عالِ او منخفض وتعلقوا يافطاتي عليه ما تخافوا اللي ينكسر بنجبره واللي بينجرق المستشفى جاهز وعلى حسابي..انتوا عظام رقبتي  واكيد ما تتركوني وبتضحوا بحالكم كرمال عيوني..
قرايبي..فزعتي.. ما تفضحونا قدام اللي يسوى واللي ما يسوى.. لا تفضحونا قدام فلان ابن فلان يفوز وعشيرتكم الكبيرة ما شاء الله حولها وحواليها ما يطلع لها كرسي بالبرلمان..انتوا وصلوني للكرسي وما رح تشوفوني مرة ثانية ..والله ما برجع واطلب منكم شيء.. ما رح اتعبكم.. حتى رقم تلفوني رح اغيره حتى ما ازعجكم باتصالاتي..
وانتوا يالمعلمين عيال عشيرتي..رح اعمل احلى نقابة لعيونكم..وابشروا بالعدالة وبالديمقراطية..والمساواة  على ايد ورجل..
تاكدوا ما حد رح ينفعكم غيري..فانا منكم واليكم..مرشحا للتجديد والتغيير ..ولا للشعارات.. ونعم للخدمات.. واي شيء بكم اياه..بس انتخبوني..
عظام رقبتي..فزعتي..النشامى " وعسى ان تكرهوا شيئا وهو خير لكم" انتوا طول عمركم ما تحسنوا الاختيار..فانتخبوني..ليش هي اول مرة بتصير معكم..انتخبوني وما عليكم..



هناك 5 تعليقات:

  1. على فكره انا بحب الكنافه يعني مش مشكله انا في امريكا باعطيكي صوتي ولا يهمك شو يعني كله صوت بس بدي صدر كنافه من العنبتاوي هه وعليه فستق حلبي ولعيونه
    الله يعينكم على هيك مجلس!

    ردحذف
  2. يسلملي هالصوت يا رب..واحلى سدر كنافة لعيونك..والله يا ريت لو بقدر ابعث لك الكنافة على امريكا..تعالي عالاردن واحلى كنافة ومن العنبتاوي ..ابشري

    بالنسبة للمجلس..الله يعينا عليه..دعواتك اختي ربنا يعينا

    ردحذف
  3. أي هيك البيانات الانتخابية و اللا بلاش
    صوتي إلك محملا ً من جنوووووووووووب السعودية

    *** من الآخر... بأكم بتشتري الصوت؟ و شو بالنسبة للأصوات بالجملة؟ بدنا سعر مرتب و بسرعة الله يخليكي لأنو عنا اكثر من عرض!

    :((((

    ردحذف
  4. والله صوتك بالدنيا اخي هيثم...
    العرض خليه براني بلاش الجماعة يروحوا يحكوا عنا بنشتري اصوات وهات حلّها بعدين مع الحكومة بيلاقولنا تهمة شراء اصوات...وبعدين يصيروا بيحكوا بالمال السياسي...خليها مستورة

    ردحذف
  5. والله؟؟

    ردحذف