إجمالي مرات مشاهدة الصفحة

الثلاثاء، 26 أكتوبر، 2010

وزير....بيــــــــــــئة...


                                                الصورة من وادي السلط اللي كانوا يزرعوا فيه فأووس


وزير بيئتنا في الاردن مو عاجبه الصحفيين..وحكى عنهم كلام ما بيليق بحق اناس محترمين يحترموا شرف مهنتهم..وزيرنا البيئي ..شو بيعرفه عن البيئة عندنا بالاردن اصلا..ماله دخل فيها ولكن لانه ابن نعمه وكابيتالي جاء ضمن تشكيلة الحكومة..يالله ما علينا..
انا حضرت لقائين لهذا الوزير في السلط واحد منهم كان في دار المحافظة وكان طول الجلسة( آل وألنا) مهو مدني يا اخوان..المهم كان يحكي لنا في الجلسة عن سفراته برا وكيف كان الاهتمام بالبيئة في الدول اللي زارها..وبعدين صار يحكي لنا عن جده لما كان عايش في السلط وبيزرع فقوس( على رأيه فأووس) بوادي السلط ..(ياالله كانت وادي السلط بتجنن وكتير حلوة وهلأ كتير تغيرت)..على راي الوزير
وبعد اكم يوم حضرت ورشة عمل برعايته بجامعة البلقاء التطبيقية وكان اخوانا الصحفيين يتطلعوا بوجوه بعض شو يكتبوا للوزير بالخبر اللي رح يبعثوه لصحفهم لانه ما حكى شيء مفيد صار يحكي عن حاله وانه صار له زمان يتعامل مع التكنولوجيا وانه عنده ايميل من زمااااااااااان..وبعدين صار يحكي انه من كثر مشاغله بطل يقدر يفوت على صفحته عالفيس بوك..يا حرام مو ملحق عالشغل,,( هلأ بعد اقالته صار فاضي يروح يزور الفيس بوك براحته)  وبيحكي عنا ما بنفهم ..شو رايكم

هناك 6 تعليقات:

  1. اولا يسلم تمتش يا بنت يا نشميه ,,,خليني احتشي بلدي بلاش يقولوا عني بتمدن ,,الله يقطع هيك مدنيه خربت بيوتنا وصارت حنوكنا عوجه عشان نزبطها ,,,المهم كله هيك عم بيصير روحات وجيات وأجتماعات وصرف مصاري ومشاريب ومناسف ,,,,عشان شو ,,,عشان ولا شي
    الخلاصه ولا شي وكمان بيروح تعبان ومهدود حيله على هالانجازات الي انجزها
    يا أخوان ماكليين روح الخل وما حدى داري بينا
    المهم يا غاليه السلط لسه يختي محافظه على جوانب كثيره من دقتها القديمه وعلى رأي عمر العبدلات
    أبيش أحلى من السلط والله أبش
    وشو بدي اقول جاي على باي ابريق شاي بالميريميه هلأ هلأ
    سلام

    ردحذف
  2. الاستاذة ابتسام

    مقال جميل واشكرك عليه واشجب بشدة استهزاء الوزير بالصحفين الذين هم من طلائع الامم

    لكن الذي لم يرق لي بالمقال استهزائك ايضا بلهجة الوزير "المدني" وتسليطك الامر على لهجته وعدم الرد على ما قاله الوزير وبيان دور الصحافة والصحفين في حملة التغير الشامل في الوطن

    دمت بود وياسمين
    ولكي جزيل الشكر

    ردحذف
  3. الاخ مؤيد..اولا شكرا لمرورك بمدونتي
    وثانيا ما كتبته ليس كما فهمته انت استهزاء بلهجة الوزير المعني فكل لهجات الوطن على راسي والله وبحترمها لكن ما اردت الاشارة اليه هو اسلوب الوزير واهتماماته البعيدة عن البيئة ليس الا
    وان اردت ان اكتب مقالا للرد على تصريحات الوزير فهذا اعتبره ردا عليها دون ان اشير للكلمات التي قالها لانني لا استسيغ تكرار كلماته
    وشكرا مرة اخى لمرورك..وشكرا للهجة الوزير التي جعلتك تمر من هنا

    ردحذف
  4. اختي خلود اهلا بك..نورتي المدونة
    وشكرا لكلماتك..كل اللهجات على عيني وراسي واخترمها جدا..
    هذه هي الانجازات فقط!!!!!ولا غيرها
    واحلى ابريق شاي بالميرمية لانه هل صار وقتها..النعنع خليه للصيف
    " وابيش احلى من السلط"

    ردحذف